Atamızın Orjinal Metinlerinden

Latin Harfleri ile:





30/9/[1]338

Türkiye Büyük Millet Meclisi Reîsi
Başkumandan Gazi Mustafa Kemal Paşa Hazretleri'ne
Ankara'da yapılacak merâsim-i istikbâliye programıdır.


1-Gâzî Paşa hazretlerinin Ankara'ya yevm-i muvâsalatları henüz ma‘lûm değildir. Bu bâbda kat‘î ma‘lûmât vürûdunda gazeteler ve suver-i sâire ile i‘lân olunacakdır.

Merâsim-i istikbâliyenin sükûn ve intizâm dâiresinde cereyânını te’mînen müstakbilîn tarafından işbu program ahkâmına ri‘âyet buyurulacakdır.

2-Paşa hazretleri Ankara'yı istasyon cihetinden teşrîf buyuracaklardır. Merâsim istasyon ile Türkiye Büyük Millet Meclisi binâsı arasındaki sâhada cereyân edecek ve bunu müte‘akib Başkumandan Paşa hazretleri tarafından Meclis'de riyâset odasında muhtasar bir resm-i kabul icrâ olunacakdır.

3-Merbût krokide görüldüğü vechile istasyon ile Meclis arasında üç tâk-ı zafer inşâ edilmişdir.

4-Paşa hazretlerinin uzakdan istikbâli için Türkiye Büyük Millet Meclisi Birinci Reîs Vekîli Konya Mebûsu Vehbi Efendi hazretleri riyâsetinde Hey’et-i Umûmiyece bâ-kur‘a intihâb edilen on zâtdan mürekkeb bir hey’et hareket edecekdir. Vâli, belediye reîsi ve Ankara kumandanı da ayrıca bir hey’et hâlinde istikbâle gideceklerdir.

5-Paşa hazretlerinin mezkûr hey’etlerle beraber istasyona muvâsalatlarını müte‘âkib ale'l-usûl muzıka ile bir müfreze-i askeriye tarafından resm-i selâm îfâ olunacakdır.

6-Hey’et-i Vekîle ve Türkiye Büyük Millet Meclisi a‘zâsı istasyonda veyahud meclis binâsı önünde resm-i istikbâle iştirâk ederler.

7-İstasyon civârındaki tâk-ı zaferle köprü arasındaki mıntıka Ankara Garnizonu'nu teşkîl eden bilumûm kıta‘ât ile ümerâ ve zâbitâna tahsîs kılınmışdır. Paşa hazretlerinin bu mıntıkaya takarrüblerinde işbu hey’et nâmına Ankara Kumandanlığı tarafından gazâ-yı ekber münâsebetiyle îfâ-yı tebrîkât ve arz-ı hoş-âmedî olunacakdır.

8-Köprü ile dört yol ağzındaki tâk-ı zafer arası Ankara ve civâr köylerden gelecek eşrâf-ı memleket, ahâli ve esnâfa tahsîs kılınmışdır. Bu mıntıkanın başında umûm belde nâmına belediye reîsi tarafından arz-ı tebrîkât ve hoş-âmedî edilecekdir.

9-Dört yol ağzındaki tâk-ı zaferle meclis binâsının istasyon cihetinde bulunan nâ-tamâm binâ temelleri arasındaki mıntıka Ankara Vilâyeti me’mûrîniyle devâ’ir-i merkeziye müsteşârları ve rü’esâ-yı me’mûrînine ve Ankara mekâtib talebesi ne tahsîs kılınmışdır. Başkumandan Paşa hazretlerine bu mıntıkanın baş tarafında Ankara Vâlisi tarafından arz-ı tebrîkât ve hoş-âmedî edilecekdir.

10-Erkân-ı matbû‘ât, Hilâl-i Ahmer, Himâye-i Etfâl Cemiyetleri'yle Ankaradaki sâir cemiyetler ve mü’essesât Meclis binâsı yanında yapılan yeni binâ önünde ahz-ı mevki‘ ederek merâsim-i istikbâliyeye iştirâk eyleyeceklerdir.

11-İntizâmı muhâfaza maksadıyla Başkumandan Paşa hazretlerinin Meclis'e muvâsalatına kadar, tafsîl edilen cadde tarafeynindeki tertîbât bozulmayacakdır ve ancak hey’et-i istikbâliye ile hey’et-i vekîle ve Büyük Millet Meclisi a‘zâsı müşârun-ileyhle beraber Meclis'e gelebileceklerdir. Paşa hazretlerinin Meclis'e muvâsalatlarını müte‘âkib müctemi‘în ve müstakbilîn sırasıyla dağılacaklardır. Ankara Vilâyeti ve Ankara Kumandanlığı gerek bu husûsda ve gerekse esnâ-yı merâsimde intizâm ve inzibâtı te’mîn için müştereken tedâbîr-i lâzıme ittihâz edeceklerdir.

12-İstikbâle şitâb eden tekmîl zevâtın yolun tarafeyninde ahz-ı mevki‘ ederek caddeyi hitâm-ı merâsime kadar tamâmen serbest bırakmaları ricâ olunur.

13-Millet Bahçesi münhasıran hanımlara tahsîs edilmişdir

Latin Harfleri ile:


12/9/[13]38

Saat: 17.35



Türkiye Büyük Millet Meclisi Reîsi
Başkumandan Müşîr Gâzî Mustafa Kemal Paşa Hazretleri'ne


Türklüğe hâs, geniş ve yümnlü görüşünüz ve dâhiyâne kumandanız tahtında Türk ve İslâm târîhine yeni ve mu‘azzam bir şeref ilâve ederek yeni bir baht ve devir açan ve milletlerin hür ve müstakil yaşamasını kendisine şi‘âr telakkî eyleyen Türkiye Büyük Millet Meclisi ordularının yıldırım sür‘atiyle Anadolumuz'un düşmandan tahlîsini te’mîn eden yüksek ve kat‘î zaferini zât-ı devletlerinin muhterem şahıslarında sürûr u fahr ile tebrîk etmekle mübâhî ve bahtiyârız. Cenâb-ı Hak kahraman millî ordularımızı tevfîkât-ı sübhâniyesine dâima mazhar buyursun.

Türkiye Büyük Millet Meclisi İcrâ Vekîlleri Hey’eti Reîsi



Hüseyin Rauf

Şer‘iye Vekîli

Abdullah Azmi
Müdâfa‘a-i Milliye Vekîli

Kâzım Paşa
Adliye Vekîli

Celaleddin Arif

Dâhiliye Vekâleti Vekîli

(İmza)
Hâriciye Vekîli

Yusuf Kemal
Mâliye Vekîli

Hasan Fehmi
Ma‘ârif Vekîli

İsmail Safa

Nâfi‘a Vekîli

Fevzi Bey
İktisâd Vekîli

Mahmud Esad
Sıhhiye ve Mu‘âvenet-i İctimâ‘iye Vekâleti Vekîli

Fuad

Latin Harfleri ile:

Karârnâme


1-Hükûmetin Ankara'dan Kayseri'ye nakli takarrür etmişdir. Hey’et-i Vekîle ân-ı hareket takarrür edinceye kadar Ankara'da müctemi‘an çalışacakdır. Vekîller bu maksadla yanlarında alıkoyacakları me’mûrînin gayrı devâ’ir ve şu’abâtı en serî‘ bir sûretde Kayseri'de îfâ-yı vazifeye hazır bulundurabilmek için daha şimdiden me’mûrlarını Kayseri'ye sevk ve tahrîke me’zûndur.

2-Bütün vekâletler ve Meclis Dîvân Riyâseti'nden ve Ankara belediye reîsiyle Müdâfa‘a-i Hukûku'ndan birer murahhasdan mürekkeb bir nakliye komisyonu Müdâfa‘a-i Milliye müsteşârı riyâsetinde ictimâ‘ edecek ve Dâhiliye Vekâleti'nden ta‘lîmât alacakdır.

3-Bu komisyon Pazartesi gününden i‘tibâren nakliyâta başlamak ve Kayseri'de devâ’ir ve mebûsân ve ecnebî mümessiller için lâzım gelen emâkini ihzâr etmek ve yollarda emniyet ve i‘âşeyi te’mîn eylemek üzere şimdiden Ankara, Kırşehir, Kayseri ve daha yol üzerindeki kasabaların arabalarına vaz‘-ı yed edecek ve nakliyâta tahsîsi için tertîbât ittihâz eyleyecekdir.

4-Bu komisyon devâ’ir-i devletin nakliyâtı ve daha sâire hakkındaki mukârrerâtını en geç yarınki Cumartesi günü öğleyin Hey’et-i Vekîle'ye bildirecekdir.

Fî 22 Temmmuz sene [1]337



İcrâ Vekîlleri Hey’eti Reîsi ve Müdâfa‘a-i Milliye Vekîli

Fevzi

Şer‘iye Vekîli

Fehmi
Adliye Vekîli

Refik Şevket
Dâhiliye Vekîli

Re’fet

Hâriciye Vekîli

Yusuf Kemal


Mâliye Vekîli

Hasan Hüsnü
Ma‘ârif Vekîli

Hamdullah Subhi
Nâfi‘a Vekîli

Ömer Lütfi

İktisâd Vekîli

Mahmud Celal
Sıhhiye Vekîli

Doktor Refik
Erkân-ı Harbiye-i Umûmiye Vekâleti Vekîli

Fevzi
Türkiye Büyük Millet Meclisi Reîsi

Mustafa Kemal




İşbu karâr meclisce aynen kabul edilmedi. Yalnız âilelerle eşyâ-yı zâ’ide şimdiden naklolunacakdır. Meclis ve hükûmet yeni karâr ittihâz edilinceye kadar Ankara îfâ-yı vazîfeye devâm edecekdir.

22 Temmuz [13]37

Mustafa Kemal

Latin Harfleri ile:



Karârnâme


Müdâfa‘a-i Hukûk Cemiyetleri tarafından ücretli ve ücretsiz olarak kaydedilip kıta‘ât-ı nizâmiyeye iltihâk etmeyen veyahud Kuvâ-yı Milliye'den birinci ve ikinci kuvâ-yı seyyâre misillü resmiyeti tanınanlardan birisine de dâhil bulunmayan Kuvâ-yı Milliye efrâdından ma‘lûl olanların kendilerine ve şehîd olanların âilesine efrâd-ı nizâmiye misillü ma‘âş tahsîsi Mâliye Vekâleti'nin 20 Haziran sene [1]337 târîhli ve Muhassesât-ı Zâtiye Müdîriyeti 1269/10959 numaralı tezkiresi üzerine İcrâ Vekîlleri Hey’eti'nin 3 Temmuz sene [1]337 târîhindeki ictimâ‘ında karâr-gîr olmuşdur.

3 Temmuz sene [1]337





İcrâ Vekîlleri Hey’eti Reîsi ve Müdâfa‘a-i Milliye Vekîli

Fevzi

Şer‘iye Vekîli

Fehmi
Adliye Vekîli

Refik Şevket
Dâhiliye Vekîli nâmına

Refik Şevket

Hâriciye Vekîli

Yusuf Kemal




Mâliye Vekîli

Hasan Hüsnü
Ma‘ârif Vekîli

Hamdullah Subhi
Nâfi‘a Vekîli

Ömer Lütfi

İktisâd Vekîli

Mahmud Celal
Sıhhiye ve Mu‘âvenet-i İctimâ‘iye Vekîli

Doktor Refik

Erkân-ı Harbiye-i Umûmiye Vekâleti Vekîli

Fevzi




Türkiye Büyük Millet Meclisi Reîsi

Mustafa Kemal

paylasım için saol knka